Maayong Panlawas

'Tagulilong' nga mga CITOM inihap nalang ang mga adlaw
ni Jannet Monares


Cebu City - Inihap na lang ang mga adlaw sa ligoy ug badlungon nga mga sakop sa Cebu City Traffic Operations and Management (Citom) partikular na niini kadtong mga traffic enforcers nga kalit lang mawagtang sa ilang pwesto panahon sa ilang duty.
Matud ni Citom Vice Chairman Rogelio “Jingjing” Osmeña nga makapila na nila pahimangnoi ang mga ligoy nga mga traffic enforcers ug karon giingong hatagan na nila sila og kinutuban.
Nagkanayon si Osmeña nga siya mismo nakamatikod nga dunay mga traffic personnel nga wala magtinarong sa ilang trabaho.
Gusto sa Citom vice chairman nga kini matangtang sa trabaho o masuspenso ba hinuon aron kini mahatagan og leksyon.
“Sige man ta kakita ug magwa-wa gud sa ilang pwesto, so, ato na nang sugdan pagsuspenso aron mahadlok na,” sumala ni Osmeña.
Nasayran hinuon gikan sa usa ka traffic enforcer nga dili gusto magpahingalan nga kasagaran nila dunay broken schedule (naa sa buntag, naa pud sa hapon, naa pud sa gabii).
Gipadayag ni Osmeña nga siya nasayod niini apan nagpabilin ang iyang pagduda nga dunay uban nga naglinigoy sa ilang katungdanan.
Sa susamang kalamboan gipahibawo ni Osmeña nga sugdan na usab nila ang pagpahigayon og training sa mga kwalipikado nga mamahimong traffic enforcer.
Tumong niini nga dunay dali nga mahulbot ang Citom sa higayon nga dunay taktakong traffic personnel tungod sa pagkabadlungon.
Nagkanayon ang Citom vice chairman nga posibling sa sunod buwan kasugdan na ang pagpahigayon og training niadtong gusto nga mag-traffic enforcer. -